ஆட்டைக்காணவில்லை !
(பீ. எம். கமால், கடையநல்லூர்)

காணவில்லை !
இருந்தும்-
யாரும்
கண்டுபிடிக்க
முயலவில்லை !
"போனால் போகட்டும் போடா "
என்று
பொடுபோக்குத் தனமாக
அவரவர் வேலையை
அவரவர் பார்க்க
நாட்கள் என்னவோ
நடக்கின்றது !
இன்னும்
கண்டுபிடிக்க  முடியவில்லை !
நம்
சமுதாயச் சந்தையில்
மேய்ந்துகொண்டிருந்த
அந்த ஆட்டை இன்னும்
காணவில்லை !
யாரோ
சுயநலத்துக்காக
பிரியாணி சமைக்க
குர்பானி கொடுத்து விட்டார்களோ ?
அந்த ஆடு
ஹப்லுல்லாஹ்வால்
கட்டப்பட்டிருந்தது !
ஈமான் புல்லை
மேய்ந்து அசைபோட்டு
இஸ்லாத்தின்  தூண்களில்
கட்டப்பட்டிருந்தது !
அன்பியாக்களின்
வாரிசுகள்
மேய்ப்பர்க ளானார்கள் !
அவர்களுக்குள்ளே
சச்சரவு சண்டைகள்
சந்தைக் கூக்குரல் !
ஆடு மிரண்டு
அறுத்துக்கொண்டு
ஓடிப்போனது;
ஊர்வந்து சேரவில்லை !
ஆட்டைப் பராமரிக்க
ஊர்ஜமா அத்தும்
ஒத்துவரவில்லை !
அவர்களும்
கவுரச் சண்டையால்
கயிற்றை விட்டுவிட்டனர் !
பாவம் ! ஆடு
அநாதை ஆகி
எங்கு கிடக்கிறதோ ?
தோழர்களே ! வாருங்கள் !
அந்த ஆட்டைக் கண்டுபிடித்து
சமுதாயச் சந்தையில்
மீண்டும் மேய
விடுவோம் வாருங்கள் !
அந்த ஆட்டின் நெற்றியில்
இப்படி எழுதி
ஒட்டியிருக்கும் :
ஒற்றுமை !